Previous Next

Papél Mídia Hodi Prezerva Memoria Pasadu

Dili - Papél mídia hodi prezerva memoria pasadu, nu'udar matéria husi oradór atuál Diretór Ezekutivu Centro Nasional Chega (CNC), Hugo Maria Fernandes, iha kolókiu públiku ba jornalista estajiáriu karteira profisionál.

Iha etapa dahaat, Kolókiu Públiku ne’ebé realiza iha Salaun Konferénsia CI, Quintal Boot, Segunda-feira, 8/3/2021, Diretór Ezekutivu CNC ko’alia barak liu kona-ba memória pasadu iha kontestu Timor nian ne’ebé mak akontese iha rai Timor hahú husi tinan 1974 to’o 1999.

“Ko’alia kona-ba pasadu, labele para iha pasadu, maibé importante liu saida maka impaktu husi pasadu ne’e agora, nune’e bele hadi’a, liu husi mídia, halo dignifikasaun, dokumenta maibé mós halo advokasia, ne’e hotu nu’udar knaar mídia nian, knar mídia nian la’ós de’it rebela buat ne’ebé akontese iha pasadu, tulun hato’o ba públiku, maibé mós iha maneira oinsá maka tulun ema sira ne’e labele sai fali vítima tan,” dehan eis Membru CI, Hugo Maria Fernandes.

Diretór Ezekutivu CNC husu ba Partisipante Estájiu Karteira Profisionál katak bainhira produs materia iha produtu jornalístiku, jornalista sira bele buka rasik materia primeiru maibé labele haluha atu akresenta mós matéria sekundáriu sira ne’ebé hola parte ona iha istória pasadu Timor.

Partisipantes iha Kolókiu Públiku ne’e mai husi mídia Jornál Independente, GMN, Naunil Mídia, Timor-Post, RTTL.Ep no Tatoli.Ip hamutuk na’in 20.

Tuir lei Komunikasaun Sosiál artigu 13, alinea primeiru haktuir kondisaun atu hala’o profisaun jornalista nian mak abilitasaun ho ninia títulu rasik, hanaran karteira profisionál, ne’ebé Conselho de Imprensa mak fó no renova.

Iha Artigu 14, lei komunikasaun sosiál mós dehan asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian. 

Entretantu tuir estatutu Conselho de Imprensa de Timor-Leste (CI), kona-ba kompeténsia sira CI nian iha artigu 44 alinea d, haktuir fó, halo foun, tahan no hasai tiha títlu profisionál jornalista nian. (CI)

 


Imprimir   Email