Dili – Membru Conselho de Imprensa de Timor-Leste (CI), Konselleiru Francisco Belo Simões da Costa, fasilita formasaun ba partesipante estájiu karteira profesionál ho materia kona-ba “Jestaun Editoriál”.
Kolókiu públiku ba partisipantes estájiu karteira profesionál ba etapa daruak realiza iha salaun konferénsia CI, Quintal Boot, Sesta, 5/3/2021 ho totál partisipantes hamutuk na’in 20 husi mídia nasionál sira.
Iha nia aprezentasaun matéria, Francisco Belo esplika diferensa independénsia editoriál no independénsia administrativu mídia, “Independen entermus jornalizmu, la’ós independen entermus administrativu,”nia haktuir.
Konselleiru Francisco Belo, ko’alia mós kompeténsia editor ne’ebé loos “edisaun notísia, kuandu nia halo edisaun ba notísia iha buat barak seidauk kompletu, nia iha direitu, dehan ida ne’e seidauk bele publika tanba seidauk kompleta rekejitu jornalízmu hanesan cover both sides, atuál no seluk tan,” esplika Francisco Belo.
Haktuir iha lei komunikasaun sosiál, artigu 32 kona-ba Estatutu Editoriál, iha Alinea primeiru dehan orgaun komunikasaun sosiál hotu-hotu tenke adopta estatutu editoriál ida ne’ebé maka define ho loloos nia orientasaun no nia objetivu sira no inklui kompromisiu atu hodi asegura respeitu ba prinsípiu sira deontolójiku no ba étika profisionál, nune’e mós hanoin-di’ak husi leitór sira. (CI)