Previous Next

Kolókiu Públiku: CI Hametin Koñesimentu Partisipante Estájiu Karteira Profisionál

Dili – Conselho de Imprensa de Timor-Leste (CI) realiza Kolókiu Públiku ba partisipante Estájiu Karteira Profisionál, ho objetivu hakle’an partisipantes sira nia abilidade iha área jornalízmu.

Iha etapa dahuluk, Kolókiu Públiku ne’ebé hala’o iha salaun konferénsia Conselho de Imprensa, Quintál Boot, Tersa-feira (2/3/2021), Diretór Diresaun Analiza no Dezenvolvimentu Mídia (DADM), Alberico da Costa Junior maka fasilita formasaun refere.

“Public symposium ka kolókiu públiku ne'e nu'udar parte ida husi programa estájiu profísionál ne'ebé dadauk ne'e la'o hela molok to'o iha ezame. Tuir dadus husi DADM, estajiáriu jornalista na'in 20 mak tuir estájiu ne'e no partisipa mós iha public symposium. Public symposium ne'e hala'o bazeia ba matéria ne'ebé hatu'ur ona iha silabus fiksu", esplika Diretór DADM CI bainhira aprezenta syllabus Kolókiu Públiku ba partisipantes sira.

Alberico esplika Modul ka matéria iha loron priméiru mak Kódigu Étika Jornalízmu, elementu 10 jornalízmu Bill Kovach no Tom Rosentil nian no Matadalan mídia sosiál ba jornalízmu.

"Tuir silabus, iha matéria sanulu mak estajiáriu sira sei hetan iha fulan ida nia laran. Seluk fali, estajiariu sira mos tenke hatama sira notisia kada semana, maibe depende ba tipu notisia. Sira sei hatama notisia babain (straight news) rua kada semana no feature news semana rua no in-dept reporting fulan ida dala ida. Ide-ne'e depende ba tipu notisia tuir silabus ne'ebé iha," haktuir Diretór DADM.

Partisipante sira iha Kolókiu Públiku hamutuk na’in rua nulu, mai husi mídia Jornál Independente, GMN, Naunil Mídia, Timor-Post, RTTL.Ep no Tatoli.Ip.

Tuir lei Komunikasaun Sosiál artigu 13, alinea primeiru haktuir kondisaun atu hala’o profisaun jornalista nian mak abilitasaun ho ninia títulu rasik, hanaran karteira profisionál, ne’ebé Conselho de Imprensa mak fó no renova.

Iha Artigu 14, lei komunikasaun sosiál mós dehan asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian. 

Entretantu tuir estatutu Conselho de Imprensa de Timor-Leste (CI), kona-ba kompeténsia sira CI nian iha artigu 44 alinea d, haktuir fó, halo foun, tahan no hasai tiha títlu profisionál jornalista nian. (CI)


Imprimir   Email