CI Sei Produs Matadalan Kobertura Sensível Jéneru

Atividade Hare nain: 959

Díli – Prezidente Conselho de Imprensa de Timor-Leste (CI), Virgílio da Silva Guterres, sai oradór iha semináriu nasionál “Hapara Violénsia Kontra Feto no Labarik Feto”, ne’ebé organiza husi organizasaun naun governamentál Rede Feto, iha salaun enkontru Rede Feto, Obrigado-Barak, 18/2/2021.

Iha aprezentasaun, Prezidente CI foka liu kona-ba knar órgaun no meiu komunikasaun sosiál hodi responde ba hapara violénsia kontra feto no labarik feto.

Virgílio Guterres kompromete komitmentu Conselho de Imprensa nian atu kontinua hala’o programa literasia mídia nomós CI sei produs manuál ida ba jornalista sira hodi hala’o kobertura kona-ba Gender Base Equality.

“Conselho Imprensa iha kompromísu atu kontinua halo programa literasia mídia, iha fatin sira hanesan ne’e, prontu mai atu fahe hanoin. Ba tinan ida ne’e, Conselho de Imprensa atu produs manuál ida ba jornalista sira atu oinsá halo kobertura gender base equality tanba Jornalista halo kobertura tenke iha perspetiva jéneru,” esplika prezidente CI.

Virgílio da Silva Guterres apela ba foin sae feto sira atu oinsá buka hatene feto nia luta, dever no opiniaun liu hosi meius komunikasaun sosiál sira. 

Partisipantes sira iha semináriu ne’e husu kona-ba pozisaun Conselho de Imprensa nian kona-ba mídia halo publikasaun obra jornalístiku la tuir faktu? nomós sujere ba Conselho de Imprensa atu halo formasaun adekuadu ba jornalista sira kona-ba kobertura sensível jéneru. 

Hatan ba preokupasaun hirak ne’e, Prezidente CI dehan wainhira rona na’in, lee na’in ka hare na’in mídia nian sente publikasaun mídia nian laloos ka sees husi faktu ne’ebé iha, bele hato’o pedidu ba direitu resposta no retifikasaun ba órgaun no meiu komunikasaun sosiál ne’ebé publika notisia ruma ne’ebé komete infrasaun. 

Iha sesaun ikus, Virgílio da Silva Guterres sujere ba feto hotu atu hahú muda lia-fuan, hanoin no hahalok patriakál maske inísiu hahú hala’o moris husi família ne’ebé opta sistema patriakál. (CI)