Díli – Prezidente Conselho de Imprensa de Timor-Leste (CI), Virgílio da Silva Guterres hato’o apresiasaun kle’an ba esforsu no kontribuisaun ne’ebé membru CI sesante na’in tolu (3) fó ba Conselho de Imprensa.
Membru sesante na’in tolu (3) ne’ebé nia mandatu remata ona maka hanesan, José Maria Ximenes, Hugo Maria Fernandes no Paulo Adriano da Cruz de Araújo.
“Ba ezitu sira ne’ebé KI hetan iha madatu dauluk, ha’u hakarak aproveita biban ida ne’e hodi hato’o apresiasaun kle’an tebes ba esforsu no kontribuisaun ne’ebé membru KI Cessante na’in 3: Sr. Jose Maria Ximenes, Sr. Hugo Maria Fernandes no Sr. Paulo Adriano da Cruz de Araujo fo ba instituisaun ida ne’e,” Prezidente CI, Virgílio Guterres hato’o apresiasaun ba membru na’in tolu, iha nia diskursu iha ámbitu tomada de posse iha Parlamentu Nasionál, kuarta feira (10/02/2021).
Prezidente dehan dalaruma haksesuk-malu iha plenária maibe iha iha ambiente respeitu mutuo atu hetan konkluzaun ne’ebé di’ak hodi dignifika papel no perfil KI nian iha publiku, sei sai referensia ba membru sira iha mandatu foun.
“Ba imi na’in tolu, la iha obrigadu, mós la iha ‘good bye!’ KI ne’ebé imi na’in 3 kontribui hamoris, sei kontinua ejiji hosi imi, imi nia hanoin matenek hodi dezenvolve-án nu’udar órgaun reguladór ne’ebé kredivel iha área komunikasaun sosiál,” deha prezidente CI.
Membrus CI iha períodu dahuluk ne’e simu tomada de posse hosi Eis Prezidente Parlamentu Nasionál, Adérito Hugo da Costa, iha loron 10 fulan Maiu tinan 2015.
Parte seluk Membru Conselho de Imprensa de Timor-Leste (CI) ba períodu daruak na’in lima (5) hanesan Virgílio da Silva Guterres (Prezidente), Benevides Correia Barros (Membru), Expedito Dias Ximenes (Membru), Francisco Simões Belo da Costa (Membru) no Otelio Ote (Membru), simu pose iha loron 10 Fevereiru 2021, iha uma fukun Parlamentu Nasionál ba mandatu daruak períodu tinan 2021-2025.
Tuir lei komunikasaun sosiál N.U 5 /2014, loron 19, fulan-novembru, iha artigu 46 hateten,mandatu Membru Konsellu Imprensa nian iha durasaun tinan haat, ne’ebé sei bele renova dala ida de’it. (CI)