Previous Next

Dezenvolvimentu Kualidade Jornalizmu, Prioridade Servisu Membru Eleitu Foun CI

Dili - Membru Eleitu ba Conselho de Imprensa, períodu 2021 – 2025, husi Parlamentu Nasionál, sei kontinua reforsa servisu Conselho de Imprensa nian ne’ebé la’o ona dezde tinan haat liu ba sein iha intervensaun ka influénsia polítiku.

“Parlamentu hili ami, tuir ami nia méritu profesionál jornalizmu no méritu profisionál jurídiku. Ami mai atu reforsa saída mak kolega sira halo ona iha tinan haat liu-ba, kontinua hadi’a liu-liu atu responde iha aspetu oin-oin, ida mak oinsá bem estar jornalista sira nian nomós kualidade produtu jornalistiku,” esplika Membru Eleitu CI, Expeditu Loro Diaz Ximenes, ba jornalista sira iha sala enkontru CI, liu husi konferénsia imprensa hafoin remata enkontru dahuluk membru CI foun ba hili Prezidente CI foun períodu 2021 – 2025, segunda – feira (25/01/2021).

Expedito kompromete nafatin defende liberdade imprensa no liberdade espresaun nomos sei la lori mensajen polítika ba Conselho de Imprensa.

Iha fatin hanesan, Membru Eleitu CI, Benevides Correira Barros, hateten demokrasia mak báze ba dezenvolvimentu mídia iha Timor-Leste.

“Estadu de direitu demokrátiku ne’e, Lei mak iha leten, ita nia Estadu no Governu hatudu, Kumprimentu ba buat ida Lei nomós tau iha pratika buat ida demokrasia ne’e, ida ne’e mak valór importante ba dezenvolvimentu progresu mídia iha Timor-Leste”, esplika Benevides.

Reprezentante Mídia Na’in, Otelio Ote, iha komitmentu bazeia ba papél CI atu tulun hasa’e koñesimentu jornalista no mídia na’in sira no husu mós kolaborasaun iha servisu hamutuk ne’ebé di’ak husi jornalista no mídia na’in sira.

“Ema barak la entende papél Conselho de Imprensa. CI rezolve de’it problema konteúdu no kualidade jornalizmu. Ita konsentra de’it ba kualidade jornalizmu no karik ita atu husu mak mídia na’in sira tenke nakloke-án atu partisipa ativu bainhira Conselho de Imprensa loke dalan ba iha hakbiit kualidade jornalizmu, ema hotu tenke mai partisipa treinamentu, tenke ativu iha programa sira” dehan Otelio Ote. 

Haktuir iha lei komunikasaun sosiál, artigu 44 kona-ba kompetensia sira Conselho de Imprensa nian maka atu promove liberdade imprensa no liberdade espresaun no independénsia meiu komunikasaun sosiál nian husi influénsia ema se de’it, grupu ka interese polítiku no ekonómiku.

Iha artigu 45, lei komunikasaun sosiál, haktuir kona-ba kompozisaun Conselho de Imprensa, reprezentante na’in rua hili husi jornalista sira, meiu komunikasaun sosiál hili nia reprezentante ida nomos Parlamentu Nasionál hili nia reprezentante na’in rua ne’ebé ida nudar peritus legál no ida seluk peritus iha área komunikasaun sosiál. (CI)


Imprimir   Email