Virgílio Guterres, Re-Eleitu Nu’udar Prezidente CI

Atividade Hare nain: 3568

Dili - Atuál Prezidente Conselho de Imprensa de Timor-Leste (CI), Virgílio da Silva Guterres, re-eleitu ba mandatu daruak nu’udar Prezidente CI, períodu 2021-2025 liuhusi eleisaun sekretu ne’ebé realiza iha salaun enkontru CI, Quintal Boot, Segunda-feira, 25/1/2021.

Membru eleitu ba Conselho de Imprensa períodu 2021-2025, hanesan Konselleiru Benevides Correia Barros, Expedito Dias Ximenes, Francisco Simões Belo da Costa, Otelio Ote no Virgílio da Silva Guterres, realiza enkontru dahuluk hodi hili Prezidente CI ho nia rezultadu votasaun hanesan, Virgílio da Silva Guterres, votus III no Expedito Dias Ximenes, votus II.

“Fó apresiasaun maka’as e mós konfiansa ne’ebé boot tebes ba kolega sira ne’ebé eleje ha’u, hili ha’u, atu kontinua hanesan Prezidente Conselho ba termu foun ninian, tinan haat tuir mai, ha’u hanoin prosesu ne’ebé la’o iha Conselho de Imprensa, simples, envolve ema nain lima, bele hatudu liman fuan lima ne’e mak kumu hamutuk bele iha enerjia halo buat ruma, entaun prosesu simples ne’e refleta mós natureza Conselho de Imprensa nian katak Conselho de Imprensa moris defende duni liberdade de opiniaun, liberdade de espresaun, ne’ebé ita nia sidadaun sira halo e liberdade sira ne’ebé orasida imprensa maka sei sai espasu hodi hato’o liberdade sira ne’e, dehan Prezidente CI.

Prezidente CI hatutan tan katak, “dala ida tan agradese ba kolega sira hotu ne’ebé ohin tuir prosesu ida ne’e, hein katak tuir mai komunikasaun ho Parlamentu Nasional, atu halo lais liután prosesu ida ne’e, atu nune’e Conselho de Imprensa bele kontinua haforsa liután nia servisu ne’ebé durante ne’e hala’o tiha ona iha tinan haat liubá.”