Maliana – Conselho de Imprensa de Timor-Leste (CI) servisu hamutuk ho Ajénsia Programa Nasoens Unidas ba Dezenvolvimentu (PNUD/UNDP) nomós Autoridade no Komandu PNTL Munisípiu Bobonaro, realiza Treinamentu Jornalizmu Kompriénsivu ho tema, “Hametin Kompeténsia Jornalista Iha Períodu Pandémia COVID – 19,” iha salaun konferénsia Komandu PNTL Munisípiu Bobonaro, hahú 9-13/11/2020.
Iha Abertura, Komandante Komandu PNTL Munisípiu Bobonaro, Octavio de Araujo, hato’o benvindu ba partisipantes sira no informa katak, “funsaun ida jornalizmu ne’e importante tebetebes, tanba ne’e, ha’u disponibiliza fatin ida ne’e tanba liga mós ho ami nia servisu, tanba jornalista ne’e buat ida esensiál.”
Komandante Komandu PNTL ne’e mós enkoraja partisipantes treinamentu sira katak, “sai jornalista ne’e buat ida di’ak maibé nia dezafiu mós barak, ameasa mós barak, jornalista ne’e independente, nia asesu iha parte ne’ebé de’it, wainhira publikasaun nia terbuka, kualkér fatin nia bele tama, tanba ne’e, seguransa ba ita boot sira, ami mak sei fó seguransa.”
Diretór Ezekutivu Conselho de Imprensa de Timor-Leste (CI), Rigoberto Monteiro, agradese tebes ba apoiu ne’ebé hetan husi Autoridade no Komandu PNTL Munisípiu Bobonaro no esplika mós objetivu prinsipál husi treinamentu katak, “atu halo jornalista sira sai krítiku ba asuntu espesífiku, iha tinan ida ne’e foku ba asuntu COVID – 19, tanba ne’e mak ita nia treinamentu, hahú iha area fronteira iha Maliana.”
“Bom susesu ba alin sira, kontinua aprende, tanba ho aprende ita bele hatene buat hotu, aprende ne’e to’o mate, aprende husi komunidade sira nia moris, kontinua halo kobertura kona ba sira nia moris, ita nia funsaun mak hatutan lian sira ema la konsege rona,” dehan DE CI.
Iha oportunidade hanesan, Project Manager husi UNDP LEARN Project, Tito Filipe, dehan, “ita hahú hikas treinamentu ida kompriénsivu ne’ebé nia foku ba jornalizme online.”
“Tanba saida iha Maliana? Ita hatene Maliana lokalizadu iha fronteira, iha movimentasaun ema, sasán ke dala ruma ba mai, ita nia atensaun oinsá maka mídia iha sensibilidade kobertura ba asuntu COVID ninian,” informa Tito.
Treinamentu ne’e loke ofisiálmente husi Sekretáriu Autoridade Munisípiu Bobonaro, Julio Cairo, “kongratula alin sira, tuir formasaun ne’e ho di’ak, ita boot sira mak sai matadalan ba dezenvolvimentu, lalenok ba atitude saida de’it mak akontese iha komunidade nia let, ami fiar ita boot sira.”
Sesaun dahuluk treinamentu foka ba “Hakerek Notísia Tuir Padraun Tetun” ne’ebé fasilita husi Project Manager, UNDP LEARN Project, Tito Filipe.
Sesaun daruak treinamentu foka ba “Tékniku Entrevista” ne’ebé fasilita husi Tékniku Profisionál Diresaun Analiza no Dezenvolvimentu Mídia (DADM CI), Caetano Alves.
No sesaun datoluk ka sesaun ikus iha loron dahuluk Treinamentu Jornalizmu Kompriénsivu foka ba “Tékniku Hakerek Notísia” ne’ebé fasilita husi Diretór Diresaun Analiza no Dezenvolvimentu Mídia (DADM CI), Alberico da Costa Junior.
Hola parte iha abertura mak Sekretáriu Autoridade Munisípiu Bobonaro, Julio Cairo, Komandante Komandu PNTL Munisípiu Bobonaro, Octavio de Araujo, Diretór Ezekutivu Conselho de Imprensa de Timor-Leste (CI), Rigoberto Monteiro, Project Manager husi UNDP LEARN Project, Tito Filipe, Formadór, Jornalista husi Mídia online ho total 22, Jornalista Radio Komunidade Maliana ho total nain 2, Mídia Office Komandu PNTL Munisípiu Bobonaro nain 2, ekipa tékniku profisionál CI no UNDP.