Díli, 29/10/2020 – Conselho de Imprensa de Timor-Leste (CI) no Ajénsia Programa Nasoens Unidas ba Dezenvolvimentu (PNUD/UNDP) apoiu husi Governu Korea liuhusi Ajensia KOICA, ofisialmente lansa formasaun ba Jornalízmu Kompriénsivu ba jornalista mídia online sira.
Conselho de Imprensa no UNDP realiza tiha ona formasaun jornalízmu kompriénsivu períodu dala tolu (3) ba jornalista mídia nasionál sira inklui rádiu komunidade no estudante komunikasaun sosiál UNTL no UNITAL ho total partisipantes ba formasaun hamutuk 158, feto 60 no mane hamutuk 98.
Prezidente Conselho de Imprensa, Virgílio da Silva Guterres hatete hato’o agradese wa’in ba UNDP tanba bele hahú hikas formasaun ba jornalista sira hodi hasa’e sira nia koñesimentu iha mundu jornalízmu.
“Conselho de Imprensa haksolok no kontinua hato’o ami nia apresiasaun ne’ebé kle’an tebes ba UNDP atu inisia fali hamutuk ho CI ba program aida ne’e,” esplika prezidente Conselho de Imprensa, Virgílio da Silva Guterres.
DeputyRepresentative Resident UNDP, Lazima Bhatta hetete UNDP suporta tiha mídia iha área oinoin iha kapasitasaun. Ba formasaun ida agora dadaun, UNDP kontinua iha komitmentu atu fo kapasitasaun ba jornalista sira no mídia en jeral.
“Ha’u ho ónra boot hola parte iha ne’e, benvindu ba partisipantes sira ne’ebé selesionadu on aba treinamentu ida ne’e. ha’u haksolok tebes hare feto barak mak partisipa iha formasaun ida ne’e. ne’e inísiu ida di’ak,” hatete DeputyRepresentative Resident UNDP, Lazima Bhatta.
Ministru Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo hato’o agradese wa’in ba CI no UNDP liuhusi Koica ne’ebé iha kooperasaun di’ak nune’e bele realiza formasaun ne’ebé adekuadu ba jornalista sira.
“Ko’alia kona-ba polítika Governu nian. Governu kaer nafatin ba lei komunikasaun sosiál katak garante liberdade imprensa, Liberdade espresaun no asesu ba informasaun. Entaun papél governu nian nafatin garante ida ne’e,” dehan MAPKOMS.
Formasaun ba etapa ikus, sei realiza durante fulan ida, semana primeiru (09-13/10) sei hala’o iha munisípiu Bobonaro, no sei termina formasaun durante semana 3 iha Díli, ho total partisipantes hamutuk na’in 22 husi mídia online sira.
Treinamentu jornalizmu kompriénsivu ne’e kobre modul ka materia lubuk ida maka hanesan étika jornalízmu,oinsá dezenvolve istória, téknika entrevista, ortografia lian tetun, gender sensitive reporting, digital security, foto journalism, video journalism planu (TOR) kobertura, jornalímu rádiu, onsit visit no prátika newsroom. (CI)