MAPKOMS Hala’o Vizita Kortezia Conselho de Imprensa

Atividade Hare nain: 1472

Díli, 26/10/2020 – Kuadru Conselho de Imprensa de Timor-Leste (CI), simu vizita kontezia husi Ministru Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo iha edifísiu CI, Quintal Boot, Díli hodi partisipa enkontru regular ho CI.

Iha biban ne’e, Ministru MAPKOMS apresia ho serbisu CI no kompromete atu serbisu hamutuk di’ak liutan iha asuntu diseminasaun informasaun, alterasaun lei Komunikasaun Sosiál no Estatutu Conselho de Imprensa.

Ministru MAPKOMS mós husu atu Conselho de Imprensa bele hola parte iha atividade Naroman ba Suku hodi disemina informasaun sira kona-ba komunikasaun sosiál kabe ba kompetensia sira CI nian, nune’e públiku bele esklaresidu ho serbisu sira Conselho de Imprensa nian.

Vizita kortezia MAPKOMS, simu direta husi Prezidente Conselho de Imprensa de Timor-Leste (CI), Virgílio da Silva Guterres, Konselleiru Jose Maria Ximenes, Konselleiru Francisco S. Belo da Costa, Diretór Ezekutivu, Rigoberto Monteiro, estrutura no funsioáriu tomak Conselho de Imprensa.

Enkontru regular ne’e nu’udar komprimísiu Ministru Asuntus Parlamentares no Komunikasaun Sosiál no Conselho de Imprensa de Timor-Leste nian, hodi fahe hanoin ba malu oinsá bele dezenvolve no promove di’ak liutan liberdade imprensa no liberdade espresaun iha Timor-Leste.

Hafoin simu pose husi Prezidente da Repúblika, MAPKOMS halo ona vizita kortezia ba órgaun no Meiu komunikasaun sosiál sira, inklui Asosiasaun Jornalista sira. Ikus mai, ba dahuluk MAPKOMS hala’o vizita kortezia ba Conselho de Imprensa hodi bele hare besik liutan kondisaun serbisu CI nian. (CI)