Dili - Conselho de Imprensa de Timor-Leste, fó tomada de pose ba Diretór Diresaun Rejistu no Apoiu Juridiku (DRAJ) no Diretór Diresaun Rekursu Umanu (DRH), iha Setembru tinan ne'e, iha eis salaun formasaun Lingua Portugés ba Mídia, Quintal Boot.
Iha diskursu, Prezidente Conselho de Imprensa de Timor-Leste (CI), Virgílio da Silva Guterres, hato’o agradese wa’in ba hotu-hotu ne’ebé hola parte iha prosesu tomak rekrutamentu nian, “hodi Conselho de Imprensa nia naran hakarak hato’o agradese mós ba Komisaun Funsaun Publika (KFP),ninia partisipasaun nomós nia apoiu tomak ba Conselho de Imprensa atu halo prosesu rekrutamentu ida ne’e, ba painél jury ne’ebé partisipa iha ne’ebé, konselleiru no Diretór Ezekutivu CI no mós ekipa husi Funsaun Públiku nia servisu, atu halo analiza ba dokumentus e mós halo entrevista ho kandidatus sira ne’e ikus mai ita bele hetan ema nain rua ne’ebé mai iha diresaun xabi Conselho de Imprensa ninian.”
Iha oportunidade hanesan, Diretora Nasionál Forsa Travalho e Mobilidade, Komisaun Funsaun Publika (KFP), Anita Tavares, hato’o mós parabens ba Diretores sira ne’ebé hetan tomada de pose, “parabens ba Diretores nain rua ne’ebé tuur iha estrutura ne’e, ita bot sira rasik sertífika ita bot sira nia an, iha prosesu ida naruk, liu husi selesaun Komisaun la’o hamutuk ho Conselho de Imprensa atu bele hetan ita boot sira nain rua ne’ebé ita boot sira rasik maka sertífika ita-boot sira nia an, hodi prenxe estrutura Conselho de Imprensa.”
Partisipa iha serimónia tomada de pose ne’e mak Prezidente CI, Membru CI, Diretór Ezekutivu CI, Reprezentante MAPKOMS, Diretora Nasionál Forsa Travalho e Mobilidade KFP, Fiskál Uniku CI, Asesór CI, Diretór Diresaun sira CI nian no Funsionáriu CI ho total ema nain 70.