Dili, Timor-Leste - 8 Agostu 2017 – Relasiona ho atividade jornalístika kanál mídia nian iha periódu eleisaun parlamentár, Conselho de Imprensa nu’udar entidade reguladór independente Estadu nian ne’ebé tau matan ba knaar kanál mídia sira iha railaran espresa ninia lamentasaun ba RTTL (Rádiu Televizaun Timor-Leste) tamba la hakunu públiku nia direitu atu hatene (Public’s right to know) hodi transmite direta rezultadu apuramentu nasionál eleisaun parlamentár nian.
Liu husi komunikadu imprensa iha Tersa (8/8), Prezidente Coselho de Imprensa, Virgilio da Silva Guterres, bolu antensaun ba RTTL nu’udar kanál mídia Estadu nian iha obrigasaun étika atu transmite diretamente rezultadu apuramentu nasionál eleisaun parlamentár nian, nune’e públiku, liu-liu povu Timor-Leste bele hatene prosesu tomak husi apuramente nasionál ne’e rasik no rezultadu finál husi Komisaun Nasionál Eleisaun (CNE).
“Púbiku tomak, liu-liu votante sira hein hela transmisaun direita husi RTTL nu’udar mídia Estadu nian kona-ba apuramentu nasionál bainhira la’o hela iha Salaun CNE nian. Maibé kuaze loron tolu prosesu ne’e la’o laiha transdireta husi RTTL,” hateten Virgilio Guterres.
Nia esplika katak, tranzmisaun direta kona-ba prosesu apuramentu nasionál nu’udar dalan di’ak-liu atu bele kontra rumor no notisia falsus sira ne’ebé ema iresponsavel sira divulga iha mídia sosiál. Transmisaun direta mós bele halakon duvida sira ne’ebé mosu iha komunidade nia leet durante prosesu refere.
“Transmisaun direta nu’udar dalan di’ak liu atu halakon duvidas sira ne’ebé mosu iha komunidade nia leet, liu-liu iha ambiente polítika ida dadauk ne’e tanba ida ne’e hato’o faktu loloos kona-ba prosesu apuramentu nasionál,” Virgilio afirma hikas.
Relasiona ho notisia falsu sira ne’ebé ema balu lansa iha mídia sosiál dadauk ne’e, Conselho de Imprensa husu ba públiku tomak atu lalika fiar notisias sira husi mídia sosiál, liu-liu Politika Timor. BlogSpot.com tanba notisia hirak ne’e la bázea ba faktu, maibé inventouzu ka la tuir realidade lolos.
“Husu ba públiku tomak ka sidadaun hotu-hotu atu labele fiar “fake news” sira ne’ebé mídia sosiál, Politika Timor.Blogspot.com kontinua divulga. Ida-ne’e nu’udar propaganda baratu ida atu soran ita nia lider sira iha ámbiente polítika dadauk ne’e,” afirma Virgilio Guterres.
Conselho de Imprensa nu’udar entidade reguladora imprens, hala’o ninia atribuisaun no kompetensia ne’ebé la submete ba diresaun ka orientasaun sira husi podér politíka nian, ho nia misaun prinsipál mak atu promove liberdade espresaun no liberdade imprensa iha rai laran