Komunikadu Imprensa

CI Sei Serbisu Hamutuk ho PNTL Hodi Garantia Liberdade Imprensa no Liberdade Espresa iha TL

CI Sei Serbisu Hamutuk ho PNTL Hodi Garantia Liberdade Imprensa no Liberdade Espresa iha TL

Liu hosi enkontru serbisu institusionál entre Conselho de Imprensa de Timor-Leste (CI) ho Polísia Nasionál Timor-Leste (PNTL) iha iha kuartel jerál PNTL, Cai-Coli, Díli, Kinta-Feira, 25/05, hamosu komitmentu boot entre CI ho PNTL atu serbisu hamutuk hodi Garante Liberdade Imprensa no Liberdade Esprensaun iha Timor-Leste (TL).

Enkontru ne’ebé partisipa hosi Komandante Jerál PNTL, Julio da Costa Hornai,  Prezidente CI, Virgílio da Silva Guterres, Konsilleiru no Estrutura ezekutivu CI nian, diskuti kle’an liu kona-ba oinsá serbisu hamutuk entre CI ho PNTL liuhosi Memorandum of Understanding (MoU) iha tempu besik.

Prezidente CI, Virgilio da Silva Guterres hatete  serbisu hamutuk CI ho PNTL ne’e hare liu ba oinsá atu garante Liberdade imprensa no Liberdade jornalísta sir aba halo kobertura.

“Conselho de Imprensa desidi atu mai hasoru Komandante Jerál PNTL nian, atu hato’o ami nia inisiativa atu iha kooperasaun entre instituisaun 2 ne’e, liuliu atu garante liberdade imprensa, liberdade jornalísta sira atu halo kobertura, tanba dalabarak entendimentu la hanesan, liuliu imprensa, maluk jornalísta sira iha entendimentu ne’ebé la hanesan e mós ita nia maluk Polísia sira serbisu iha kampu, entaun sempre mosu problema ki’ikoan ne’ebé bele rezolve liu hosi kooperasaun,” informa Prezidente CI.

Enkontru ne’e mós informa ba PNTL atu implementa direitu de resposta inklui fasilita formasaun atu jornalísta no PNTL bele kompriende ida-idak knaar.

“Atu informa ba PNTL hanesan instituisaun ida ne’ebé maka mantein órde públika atu aplika ka implementa saída maka ami bolu direitu de resposta katak bainhira Jornalísta sira ou Jornál ou mídia ruma públika kontiudu ruma ne’ebé laloos kona-ba PNTL ou ema PNTL iha direitu atu hato’o resposta ba mídia ne’ebé hakerek e mídia ne’ebé hakerek tuir regulamentu, tuir lei tenke iha obrigasaun atu públika iha fatin ou pájina ne’ebé hanesan, notísia ne’ebé sira públika,” esplika Virgilio da Silva Guterres.

Tempu hanesan, Komandante Jerál PNTL, Komisáriu Julio da Costa Hornai, hateten PNTL no CI persija serbisu hamutuk hodi kontribui ba liberdade imprensa no liberdade espresaun inklui serbisu seguransa nasionál.

“Ideias ne’ebé maka Prezidente ho nia ekipa mai hato’o ne’e importante tebes para oinsá ita bele kria MoU ida ka serbisu hamutuk oinsá, ne’e ita koopera ba malu, tantu Polísia ho jornalísta sira fahe informasaun ba malu, nune’e mós bele hadi’a buat balun ne’ebé durante ne’e la’o,” salienta Komandante Jerál PNTL.

Iha enkontru ne’e, Prezidente CI mós entrega Kartila Jornalístika Timor-Leste ho relatóriu serbisu CI durante tinan ida, ba Komandante Jerál PNTL. (*)